8 Sentyabr 2016-cı il, Sumqayıt şəhər İcra hakimiyyəti və Təhsil şöbəsi tərəfindən təşkil olunan müəllimlərin ənənəvi konfransındakı çıxışımın mətni.
Hörmətli qonaqlar və hörmətli konfrans
iştirakçıları, sizləri salamlayır,yeni tədris ilində işlərinizdə uğurlar
arzulayıram. Təhsil şöbə müdirinin məruzəsində qeyd edildiyi kimi təhsil sahəsində
uğurlarımız olsa da, qarşıda görüləsi işlərimiz də az deyil.Bu baxımdan çıxış edərək, mənfur qonşularmız tərəfindən
işğala məruz qaldığımz bir dövrdə, gənclərimizin əsl vətəndaş kimi
formalaşmasında çağırışaqədərki
hazırlığı fənninin əhəmiyyətini, təşkilini
və bu zaman vacib olan istiqamətləri vurğulamaq istərdim.
Bildiyiniz
kimi hal-hazırda GÇH Fənni, tədris proqramına uyğun olaraq, həftədə 2 saat
olmaqla X və XI siniflərdə tədris
olunur. Fənnin tədrisi zamanı gənclərimiz, dövlətimizin müdafiə qüdrəti,
Konstitusiya və qanunlardan irəli gələn vəzifələr, Silahlı Qüvvələrin təyinatı,
əhəmiyyəti və hərbi nizamnamələrin tələbləri ilə tanış olur, hərbi
xidmətin ölkə vətəndaşları üçün şərəfli vəzifə olduğunu dərk edirlər. Gənc əsgər
səviyyəsində ilkin bilik və bacarıqlara yiyələnir, müasir kütləvi qırğın
silahlarından mühafizə qaydalarını öyrənməklə yanaşı, mülki müdafiənin və tibbi
biliklərin əsaslarını mənimsəyirlər.Gənclər, bu bilik və bacarıqlara yiyələnməklə
həm fövqəladə vəziyyətlərdə öz sağlamlıqlarını və həyatlarını qoruyub saxlaya
bilir, həm də öz əsgəri borclarını yerinə yetirərkən ordu həyatına tez
uyğunlaşır, hərbi xidməti şərəflə davam etdirir və uğurla başa vururlar.
Bu
ilin aprel ayında baş vermiş 4 günlük müharibədə, ordumuz düşmənə ölümcül zərbələr vuraraq qalib gəldi. Vətən
uğrunda son nəfəslərinə kimi vuruşaraq şəhidliyə ucalan qəhrəman əsgər və
zabitlərimiz oldu. Bu döyüşlər ordumuzun vətən torpağlarını azad etməyə qadir
olduğunu sübut etməklə yanaşı, gənclərimizin çağırışaqədərki hazırlığının və hərbi-vətənpərvərlik
tərbiyəsinin hər zaman aktual olduğunu bizə bir daha xatırlatdı. Bu gün
qarşımızda partalarda oturan yeniyetmələr,
sabah şərəfli vətən keşikçiləridir.
Gənc nəslin təlim və tərbiyəsində,
hərbi-vətənpərvərlik tədbirlərinin, yaşlı nəsil ilə görüşlərin və hərbi-idman
oyunlarının da böyük payı vardır.
Şəhər rəhbərliyinin və təhsil
şöbəsinin tövsiyəsi ilə,məktəblərdə təşkil olunan və gənc nəslin mənəvi cəhətdən
tərbiyə olunmasında mühüm rol oynayan tədbirlərə,müharibə və əmək veteranları
ilə keçirilən görüşləri misal çəkmək olar.
Hər tədris ili ərzində şəhər
və respublika səviyyəsində təşkil olunan “Şahinlər” hərbi-idman oyunları, gənclərimizin
layiqli vətəndaş kimi formalaşması ilə bərabər, sağlam həyat tərzi sürməsinə səbəb
olur. Vətən sevgisi ilə, fiziki cəhətdən sağlam yetişən gənclik, silahlı qüvvələrimizin
əsas sütunlarını təşkil edir.
Günümüzün reallıqlarını nəzərə
alaraq,GÇH Fənninin heç olmasa həftədə 1 saat olmaqla VIII və IX siniflərdə də tədris
olunmasını bir təklif kimi nəzərinizə çatdırmaq istərdim.
Gənclərimizin əsl vətənpərvər,
əqidəli insan ,vətəni öz canından artıq sevən və bu yolda hər cür çətinliklərə
hazır olan vətəndaş kimi yetişdirmək istəyiriksə ,ilk növbədə biz müəllimlər,
öz peşəkarlığımızı artırmalı və gənc nəslə nümunə olmalıyıq. Bunun üçün isə,
yüksək mənəvi və psixoloji hazırlığa, zəngin təcrübə və biliklərə, müasir
texnologiyalardan və İKT-dən istifadə bacarıqlarına, humanist və demokratik düşüncə
tərzinə malik olmaq lazımdır. Bu keyfiyyətlər bizim həyat tərzimiz olmalıdır,
çünki ən gözəl təlim, təlim alana örnək olmaqdır.Bu məqamda Ümummilli liderimiz Heydər Əliyevin
müdrik kəlamını qeyd etmək istərdim: -“Cəmiyyətin gələcək tərəqqisi bir çox cəhətdən,
indi gənclərimizə nəyi və necə öyrətməyimizdən asılı olacaqdır. “
Düşünürəm ki, günümüzün tələblərinə uyğun olaraq, müasir
tədris anlayışını, əvvəlcə öz düşüncəmizdə formalaşdırmalıyıq. Unutmayaq
ki, yetişdirdiyimiz gənc nəsil, bir neçə
ildən sonra bizləri əvəz edəcək. Xalqımızın, dövlətimizin rifahı və inkişafı
naminə, yetişdirilmiş hər bir vətənpərvər gənc bizim gələcəyimizdir. Bu gələcəyin işıqlı və
aydın olması üçün bu gün var qüvvəmizlə çalışmalıyıq ! Bu şərəfli yolda bütün təhsil
işçilərinə uğurlar arzulayıram ! Diqqətinizə
görə təşəkkür edirəm !
